(1906) Non volviamos tener otra quimera

link

Estaba yo tristucu y pesarosu
Arrimau al varal de una portiella,
Bien seguru que había de servime
Pa calentai el llombu á la reciella.
Cuando en esto veo un rapazucu
Con papeles baxar per una riega,
Y gritaba: ¡EL ECO DE CABRANES!
Compralu, muyerines, que ahora llega:
Venía sin madreñes ni escarpines,
En mangues de camisa y sin montera,
Y anque coxu por mor de una botada,
Non por eso dexó saltar la sevia;
Apenes llego á min, ya tou el pueblu
Xuntóse pol periódicu á carrera;
Dáme diez -decía Xuan de RIves;
A mín, cien -contesta Soleyera;
Mil, á mín -gritaba un señor gordu;
Todos mios -replica Topinera;
Ojo al Cristo y repártiense con tinu,
-Dixo el Pitu- ó armo agarradiella.
Estaba ya el rapaz tou temblorosu,
Seguru que i rompin una costiella,
Pes tantu amenuzaben los pedíos,
Que imposible tocayos un siquiera.
Arreciaben los gritos y quexíos.
Y garrando al rapaz pe la culera,
Fui tantu el alborotu que allí armaren
Que contalo non puedo anque quisiera.
¡Alto ahí! - dixi yo, naide se movia,
Que con razón y juerza tou se arregla,
Non sea que me vea en el apuru
De echar mano al varal de la portiella.
Repartí esos papeles como hermanos,
Y en leyéndolos un, otru los leya;
Otra vez encargalos mas temprano,
Non volviamos tener otra quimera.